Ya acaba ya el serada de libro por este trimeste! Ay puede ya yo descansa otra vez!

Chipla, quanto noche tambien aquel no hay yo puede durmi embonamente. Ya caba gayot sale grano na mio cara. Un grande grano cerca na mio nariz. Mga tres o quatro hora lang gayot yo ta puede dormi noche por noche, acabar hende pa gale ta puede man tulo mio laway, hala, disperta ya tambien ole para pricura man balanse kunel mga numero. Vale man el trabajo y manada yo quosa ta puede aprende, pero el salida golpe tambien gayot mio cuerpo. Tambien mio bueno supervisora, cay ta ayuda gat ele comigo. Nuevo pa iyo na proseso, y ele hende tamen tanto sabe kay otro gente ta agara kunel trabajo antes. O hala na otro trimeste, liviano ya.

De otro mes, ya participa yo na "Bantay Kalikasan Project" na La Mesa, onde ya siembra yo manada semilla. Yahoo! Cansao pero de veras, vale el sentido si ta puede ayuda con el nuestra tierra. Hende man yo fanatico, pero masquin que laya, masquin impocito, quiere tambien yo hace mio papel. Mira con el letrato ya saca si Yen, mio supervisora, mientras ta siembra yo. Serioso no, haha!

Vale el lugar, pero para llega na La Mesa, ay pasa un lugar que bieeeeeen pobresa, el municipal de Payatas. Hende tu cre, este un lugar bien lleno de basura! Todo basura de Manila aqui ta buta. Que de bien yede, maca murir. Pobre man mga gente alla, ta respirar mabuling aire.


Desde Abril uno de mio mga mejor amigo desde Zamboanga ya vene na Makati para aqui ya queda y trabaja- si Jefrey (el solo "Jefrey" na mundo palta un F!). Ya habla le cansao el trabajo onde le ta trabaja alla na Cagayan de Oro, por eso ya invita yo con ele solicitir trabajo na Shell- onde yo ta trabaja. Dentro de un semana ya acepta con ele, y ara, tres ya kame man compañero de clase taqui na Shell! Junto tambien ele ta queda na di mio apartamento, y ele pa ta coci con el di amon comida para lleva na empleo. Si, ya impesa ya yo lleva fiambrera na empleo! Como na escuela lang tambien kame!